Экс-вице-премьер Дүйшөнбек Зилалиев 9 жылга эркинен ажыратылды

Бүгүн, 5-октябрда Бишкектеги Биринчи Май райондук сотунун өндүрүшүндө "мыйзамсыз баюу" беренеси менен айыпталып жаткан мурдагы вице-премьер-министр Дүйшөнбек Зилалиевге карата сот өкүм чыгарды. Бул тууралуу мекеменин басма сөз кызматынан билдиришти.

Ага ылайык, Дүйшөнбек Зилалиев 9 жылга эркинен ажыратылганы маалымдалат.

"Зилалиев Дүйшөнбек Текшербекович Жазык кодексинин 323-беренесинин 2-бөлүгүнүн 1, 2-пункттарында көрсөтүлгөн кылмышты жасоодо күнөөлүү деп табылды жана ага карата 7 жылга эркиндигинен ажыратуу менен 3 жылга чейинки мөөнөткө мамлекеттик кызмат орундарын ээлөө укугунан ажыратуу түрүндөгү жаза белгиленди. Жазык кодексинин 78-беренесинин 6-бөлүгүнүн негизинде, жазаларды жарым-жартылай кошуу менен Зилалиевге 9 жылга эркиндигинен ажыратуу менен 3 жылга чейинки мөөнөткө мамлекеттик кызмат орундарын ээлөө укугунан ажыратуу түрүндөгү жаза белгиленди. Ошондой эле үй мүлкүн конфискациялоо боюнча чечим чыкты. Зилалиевге карата камакка алуу түрүндөгү бөгөт коюу чарасы өзгөртүүсүз калтырылды", - деп жазылат маалыматта.

Окуянын чоо-жайы:

2018-жылы УКМК Зилалиевдин декларацияга киргизилбеген кыймылсыз мүлктөрү, банктык эсеби бар экенин аныктаганы тууралуу маалымат тараткан. 2019-жылы ага карата Башкы прокуратура тарабынан Кылмыш-жаза кодексинин "жооптуу кызматты ээлеген кызматкердин мыйзамсыз баюусу" беренеси боюнча кылмыш иши козголгон.

Дүйшөнбек Зилалиев 2010-жылдан 2017-жылга чейин төмөндөгү мамлекеттик кызматтарды ээлеген:

• Коргоо кеңешинин катчылыгынын катчысынын орун басары;
• Геология жана минералдык ресурстар боюнча агенттиктин башчысы;
• Өнөр жай, энергетика жана кен пайдалануу боюнча комитеттин төрагасы;
• Вице-премьер-министр;
• Мамлекеттик мүлктү башкаруу фондунун төрагасы кызматтарын ээлеген.