Өкмөт кайрадан иштеп баштады. Эркин Асрандиев жолугушуу өткөрдү

Кыргыз Республикасынын өкмөтүнүн аппаратынын түзүмдүк бөлүмдөрүнүн жетекчилери менен жыйын болду. Бул тууралуу өкмөттөн кабарлашты. Маалыматка ылайык, анда бир катар актуалдуу маселелер талкууланган.

Жыйындын жүрүшүндө өлкөдөгү коомдук-саясий кырдаалга карабастан, коронавирус инфекциясы пандемиясы күч алып жатканы белгиленген.

"Бул кооптуу илдет бир сутка ичинде 245тен ашык жаранга жукту. Өлүм дагы катталды. Жарандарга санитардык-эпидемиологиялык нормаларды сактоо боюнча түшүндүрүү иштерин активдештирүү керектиги айтылды. Жыйында негизги маселелердин бири болгон 2021-жылы тышкы карыз боюнча төлөмдөрдүн жогорку чекте болорун эске алуу менен, республикалык бюджеттин аткарылышы жана тышкы карыздарды реструктуризациялоо боюнча жүргүзүлүп жаткан иштер каралды", - деп айтылат маалыматта.

Жыйында "бардык кыйынчылыктарга карабастан мамлекеттик органдар буга чейин кабыл алынган бардык социалдык милдеттенмелерди аткарууну улантышат", - деп белгилешкен жыйындын катышуучулары.

Мындан тышкары мамлекеттик органдардын жетекчилери күз-кыш мезгилине даярдык көрүү маселесин талкуулашкан. Бардык тиешелүү мамлекеттик органдарга белгиленген тартипте иштөө жана жумуш ордун таштап кетпөө тапшырмасы берилген.