Армениянын премьер-министринин жубайы Карабахты коргоо үчүн чек арага барарын билдирди

Армениянын премьер-министри Никол Пашиняндын жубайы Анна Акопян аскердик даярдыктан өтүп, Карабахтагы чек араны коргоо үчүн барарын билдирди. Бул тууралуу чет элдик маалымат булактары жазышууда.

"Эртеңден баштап жалпы саны 13тү түзгөн айымдардын отряды (алардын арасында мен дагы бармын) аскердик даярдыктарды баштайбыз" деп жазган Акопян Фейсбуктагы баракчасына.

Ошондой эле ал Карабахка бир канча күндөн кийин барарын айткан. Мындан сырткары "душмандарга өлкөбүздү бошотуп бере албайбыз" деп кошумчалаган.

Эске салсак, 9-октябрда Армения менен Азербайжандын тышкы иштер министрлери Орусиянын президентинин чакыруусу менен Москвага келип, 10 сааттан ашуун сүйлөшүү жүргүзүшкөн. Жыйынтыгында, 10-октябрь күнү түштөн кийин тараптар Карабахтагы ок атууну токтотууга, туткундарды жана каза болгон жарандардын сөөктөрүн алмашууга, ошондой эле элдешүүнүн конкреттүү деталдары боюнча макулдашкан. Бирок ишемби күнү тараптар ок атышпоо келишимин бузду деп бири-бирин айыптай башташкан.