Самат Эркинбеков уулдуу болду. "Дарыгерлерден суранып жатып баламды көрүп алдым" дейт ал

Актёр, алып баруучу Самат Эркинбеков уулдуу болду. Кубанычы менен тең бөлүшкөн актёр, бүгүн, 29-октябрда Бишкектеги төрөтканалардын биринде жубайы көз жарганын айтып, буларга токтолду.

"Таңга маал жубайым Чолпонайдын толгоосу кармап, бир нече сааттан кийин уулубуз жарыкка келди. Пандемияга байланыштуу төрөткө катышкан жокмун. Доктурлардан суранып жатып баламды бир жолу көрүп алдым. Төрөткананын айланасында эле жүрөм, кем-карчын алып берип дегендей.

Баламды көргөндө чоң жоопкерчиликти сездим. Анын үстүнө көпкө күтүп жүрүп балалуу болгон сезим башкача болот экен. Учурда эне, баланын абалы жакшы", - дейт ал.

Самат Эркинбеков уулуна өзү азан чакырып ысым коёрун кошумчалады. "Балама кандай ысым ыйгарыларын азыр айтпай турайын. Буюрса, өзүм азан чакырып ысым ыйгаргандан кийин айтам", - деди ал.

Жубайлар 2015-жылы баш кошкон.