Элдешүү менен аяктады. Студенттердин ортосунда чыккан мушташ боюнча милиция билдирүү таратты

Бишкектеги жогорку окуу жайлардын биринин студенттеринин ортосунда чыккан мушташ элдешүү менен аяктады. Бул тууралуу Биринчи Май РИИБинин басма сөз кызматынан кабарлашты.

Маалыматка ылайык, 28-октябрда саат 16:30 чамасында Бишкек ШИИББине Жибек Жолу жана Республика көчөлөрүнүн кесилишинде 2 чет өлкөлүк жаранды белгисиз адамдар уруп жаткандыгы боюнча билдирүү келип түшкөн. Айтылган дарекке Биринчи Май РИИБинин ыкчам кызматкерлери барып, жогорку окуу жайлардын студенттеринин ортосунда пикир келишпестик чыкканын тактап, аларды милиция кызматына алып келишкен.

Окуянын чоо-жайы такталгандан кийин алар Пакистан өлкөсүнүн жана Кыргыз өлкөсүнүн жарандары экендиги белгилүү болгон.

"Алар милиция кызматына арыз жазуудан баш тартышты. Ортолорунда жаралган пикир келишпестик элдешүү менен аяктады", - деп билдиришти мекемеден.