Австрияда террордук чабуул катталды. Чабуул тууралуу эмне белгилүү?

Кечээ, 2-ноябрда Австриянын борбору Вена шаарында террордук чабуул катталды. Бул тууралуу дүйнөлүк басылмалар жазып чыгышты.

Маалыматка ылайык, террордук чабуулдан 2 адам каза болуп, 15ке чукул адам жаракат алган. Чабуул уюштургандар кимдер жана алардын максаты кандай экени азырынча белгисиз. Кол салгандардын бири өлтүрүлүп, калганы качып кетүүгө үлгүрүшкөн. Алгачкы, ок атуу 20:00дө (Бишкек убактысы боюнча 01:00) башталган.

Террордук чабуулду уюштургандарды колго түшүрүү операциясы уланууда. Австриянын жашоочуларына үйдө отурууга буйрук берилди. Австриянын канцлери Себастьян Курц окуяны теракт деп атады.