Садыр Жапаров: "100 миң сомго чейин насыя алгандардын 3 айлык үстөк пайызын төлөп беребиз"

Бүгүн, 12-ноябрда президенттин милдетин аткаруучу, премьер-министр Садыр Жапаров жыйын өткөрүп, журналисттердин суроолоруна жооп берип жатат. Анда Жапаровго "Эл менен жолугушуу учурунда 100 миң сомго чейин насыя алгандарга жеңилдик боло тургандыгын айттыңыз. Эгер аны ишке ашыра турган болсо 1 миллиард 200 миллион сом керектелет экен. Бюджеттин тартыштыгы 35 миллиард сом болуп жатканда ал каражатты кайдан табасыздар? деген суроо берилди.

"100 миң сомго чейин алынган насыялар абдан көп экен. Анткени, өзүңуздөр билгендей 100 миңге чейин кандай адамдар насыя алат? Бул албетте турмушу начар жарандарыбыз алат. Биз ошолорго караштырып бюджеттин эсебинен эмес, башка булактардан таап, 1 миллиард 200 миллион сом жумшадык. 100 миң сомго чейин насыя алган жарандарыбыздын 3 айлык пайыздарын жаап берели дедик. Анткени, булар жылда эле суранып келе жатышат. Мындан сырткары, пандемия башталгандан бери көбүнчөсү ишсиз болуп калышты. Чечилбеген маселе жок, бардыгын чечсе болот. Бир гана иштеш керек. Дагы бир жолу кайталайм бул каражат бюджеттен алынган жок", - деп жооп берди Жапаров.