Президенттин милдетин аткаруучусуна тышкы иштер министри чет өлкөлөрдөгү кыргыздардын укуктарын коргоо маселелери тууралуу маалымат берди

Бүгүн, 17-ноябрда президенттин милдетин аткаруучу, Жогорку Кеңештин төрагасы Талант Мамытов тышкы иштер министри Руслан Казакбаевди кабыл алды. Бул тууралуу президенттик аппараттын басма сөз кызматынан билдиришти.

Жолугушуунун жүрүшүндө Казакбаев өлкөнүн тышкы саясатынын артыкчылыктуу багыттарын өнүктүрүү жаатындагы ишмердүүлүгү, жогорку деңгээлде жетишилген келишимдерди жүзөгө ашыруу боюнча иштер, ошондой эле чет өлкөлөрдөгү кыргыздардын укуктары менен кызыкчылыктарын коргоо маселелери тууралуу маалымат берди.

Президенттин милдетин аткаруучу чет өлкөлүк өнөктөштөр менен эки жакка тең пайдалуу жана иштиктүү байланыштарды ырааттуу өнүктүрүү үчүн тышкы саясатты мындан ары натыйжалуу жүргүзүүнүн зарылдыгын баса белгиледи.

Талант Мамытов Тышкы иштер министрлигинин алдына өлкөнүн тышкы саясий курсун мындан ары ишке ашырууга багытталган бир катар конкреттүү милдеттерди койду.