Алмазбек Атамбаевдин абактагы жолугушуусу жашыруун камерага тартып алынган видео боюнча Аскер прокуратурасы тергөө ишин баштады

Мурдагы президент Алмазбек Атамбаев менен анын жактоочусу Сергей Слесарёвдун абактагы жолугушуусу жашыруун камерага тартып алынган видео боюнча Аскер прокуратурасы тарабынан сотко чейинки өндүрүш ишинин алкагында тергөө башталды. Бул тууралуу SUPER.KG порталына жактоочу Замир Жоошев билдирди.

"Бул боюнча иш козголуп, Кылмыштардын жана жоруктардын бирдиктүү реестрине "Өзүнө же башкаларга пайда же артыкчылык алуу максатында же башка жеке кызыкчылыктардан улам кызмат абалынан кыянаттык менен пайдалануу" беренеси менен катталды" , - дейт жактоочу.

Буга чейин 17-ноябрда Замир Жоошев узактыгы 42 мүнөттөн ашкан Атамбаев менен Слесарёвдун сүйлөшүүсү тууралуу видео 5-октябрда Ак Үйдөн табылгандыгы тууралуу билдирген. Ал эми 19-ноябрда жактоочу Башкы прокуратурага арыз менен кайрылган.