Алмазбек Атамбаевди абактан бошотууну Биринчи Май райондук соту чечет

Мурдагы президент Алмазбек Атамбаев Бишкектин Биринчи Май райондук сотунун чечими менен эркиндикке чыгышы мүмкүн.

Бул тууралуу Жогорку Соттун маалымат кызматынан кабарлашты.

Мекеменин маалыматына ылайык, Атамбаевге карата чыккан өкүм жокко чыгарылып, райондук сотко кайра башынан кароого жөнөтүлгөн.

Буга чейин Алмазбек Атамбаевдин абактан чыгышы мүмкүн экенин анын жактоочусу Сергей Слесарев билдирген болчу.

Анын айтымында, акыркы сот отурумунда мурдагы чечимдер жокко чыгарылгандыгына байланыштуу мыйзам боюнча Атамбаев абактан чыгышы керек.

Кечээ, 30-ноябрда Жогорку Сот кримтөбөл Азиз Батукаевдин мыйзамсыз бошотулушуна байланыштуу Биринчи Май райондук сотунун Алмазбек Атамбаевге чыгарган өкүмүн жокко чыгарып, аны райондук сотко кайра кароого жөнөткөнү маалымдалган.

Окуянын чоо-жайы:

Мындан 7 жыл мурун Нарын шаардык соту кримтөбөл Азиз Батукаевди "айыккыс дартка чалдыкты" деген жүйө менен бошотуп, ал ошол эле күнү өлкөдөн чыгып кеткен.

2019-жылдын апрель айында башкы прокурор Өткүрбек Жамшитов 2019-жылдын январь айынан тартып кримтөбөл Азиз Батукаевдин иши кайрадан карала баштаганын айткан.

Кримтөбөл Азиз Батукаевдин абактан бошотулушун кайра кароо иши боюнча бардык кабарларды ушул шилтемеден окуй аласыз.