"Time" журналы "Жыл адамы" наамына 2 кишини татыктуу деп тапты

Бир кылымдан ашуун убакыттан бери америкалык "Time" журналы "Жыл адамын" тандап келет. Быйыл бул наамга 2 адам татыктуу деп табылды.

Аталган журнал АКШнын жаңы шайланган президенти Жо Байден менен болочок вице-президент Камала Харрис "Жыл адамы" деп белгиленгенин жар салды.

Журналдын башкы редактору Эдвард Фельзенталдын айтымында, бул наам вице-президентке алгачкы ирет берилип жатат. Мунун себебин ал: "Байден менен Харристин тандеми тарыхый мааниге ээ", - деп түшүндүрдү.

"Байден менен Харрис редакциянын бул тандоосун сыймыктануу менен кабыл алгандыгын айтышып, ыраазычылык билдиришти. Сыйлык ыйгаруу аземи пандемияга байланыштуу онлайн өттү", - деп жазылат маалыматта.

"Time" басылмасынын маалыматына ылайык, Байден 44-президент Барак Обаманын рекордун жаңылап, АКШ тарыхында президенттик шайлоодо эң көп добушка ээ болгон. Ал эми Харрис жакынкы арада биринчи афроамерикалык вице-президент болот.

Белгилей кетсек, аталган журнал 1927-жылдан бери жылдын эң күчтүү таасирге ээ болгон инсандарды жарыялап, аларга "Жыл адамы" сыйлыгын тапшырып келет.