Тилек Токтогазиев: "Медицинадагы шалаакылыктан атам баш болгон бир нече жакын адамдарымдан айрылып калдым"

Дарыгерлер таптакыр тийбей койсо атам азыр тирүү болмок. Бул тууралуу Айыл чарба, тамак-аш өнөр жайы жана мелиорация министри Тилек Токтогазиев SUPER.KG порталынын #ГалстукТар долбоорунда билдирди.

Анын пикиринде, атасы медицина кызматкерлеринин туура эмес мамилесинен улам каза болгон.

"Атам бул жылы туура эмес медицинадан каза болду. Ага 3 жолу медициналык процедура жасалды. Дарыгерлер таптакыр тийбей койсо атам азыр тирүү болмок. Коркутуп, тез арада операция жасаш керек дешкен. Көрсө атама андай операция жасаганга болбойт экен. Муну кийин мага Түркиядан айтышты. "Эгерде андай операция Түркиядан жасалса, аны жасаган дарыгер камалмак" дешти. Атамдын карындашы айылда ооруканага кайрылса анын дартын аныктай алышпаптыр. Бөйрөгү иштебей калганын билбей жүрүптүр. Бишкекке келип гемодиализ алганча өпкөсүнө суу толуп каза болуп калды. Атамдын иниси аварияга туш болуп, жакшы операция кылдыра албай 7 жыл кыйналып жүрүп ал дагы каза болду. Ошол агамдын кызы ошол эле айылдагы ооруканага барса дарыгерлер сасык тумоо болуп калыпсың дешиптир. Бирок ал менингит болуп 3-4 күндөн кийин дүйнө салды. Айылга бардым, жогоруда айтып кеткен туугандарыбыздын көрүстөндөрү катарынан жатат. Тирүү турган туугандарымды көргөндө биз ушинтип эле азайып кете бербей чогуу күрөшүп, ушул системаны талкалап, жакшы нукка салып кетишибиз керек деген ой келет", - деди Токтогазиев.