Жүк ташуучу унаалардан 500дөн 5 миң сомго чейин алып турушкан. Чүй облустук ЖКККБнын 3 инспектору кармалды

Ички иштер органдарындагы коррупциялык фактыларды аныктоо, алдын алуу жана бөгөт коюу боюнча жүргүзүлүп жаткан иштердин жүрүшүндө УКМК "Актилек" авто жол көзөмөл өткөрүү постунда турган Чүй облустук жол кыймылынын коопсуздугун камсыздоо башкармалыгынын инспекторлору тарабынан пара алуу боюнча тутумдашкан фактылар аныкталган. Бул тууралуу УКМКнын басма сөз кызматынан билдиришти.

"Жогорудагы өткөрүү пунктунда инспекторлор документтерди текшерүүнү шылтоолоп жүк ташууга катышкан унаалардын айдоочуларынан 500 сомдон 5000 сомго чейин акча каражатын тынымсыз алып турушканы аныкталды. Аталган өткөрүү пункту аркылуу күн сайын 100дөн 200гө чейин жүк ташыган унаалар өтөт. Ыкчам иликтөө иштеринин натыйжасында 3 инспектор кармалган. Алар М.Т., Ш.Р., жана А.С. жана бул ишке тийиштиги бар делинип Чүй облустук жол кыймылынын коопсуздугун камсыздоо башкармалыгынын башчысы да кармалды", - деп жазылат маалыматта.

Улуттук коопсуздук мамлекеттик комитетинин кызматкерлери тарабынан мыйзамсыз опузалап акча талап кылган Ички иштер министрлигинин мамлекеттик жол кыймылынын коопсуздугун камсыздоо башкармалыгынын башка кызмат адамдарын аныктоого багытталган тергөө-ыкчам иш-чараларынын комплекси уланууда.