"Кечирим сурагандан кийин наамын албай эле койгон туура". Кайрат Примбердиев менен Курал Чокоевге көрүлө турган чара боюнча белгилүүлөрдүн пикири

Ырчы Курал Чокоев чет элдик долбоорду кайталайм деп коомдун сынына кабылып, талкуу чордонунан түшө элек.

Бүгүн, 13-январда Маданият, маалымат жана туризм министрлиги коомчулуктун терс реакциясын жараткан чуулгандуу программанын автору Курал Чокоевди Маданияттын мыкты кызматкери төш белгисинен ажыратты. Ал эми чуулгандуу долбоорго конок болгон Кайрат Примбердиевди Эмгек сиңирген артисти наамынан ажыратуу сунушу президенттик аппаратка жөнөтүлгөнү маалымдалды.

Аты аталган ырчыларды наамынан ажыратууну колдогон да, колдобогондор да болууда. Шоу-бизнестин айрым өкүлдөрү ырчылар кечирим сурагандан кийин наамын албай эле койгон туура деп эсептейт.

Телеалпаруучу Эркин Рыскулбеков ырчыларга коомдун катуу сыны деле жетиштүү болду деп эсептейт. "Ырчылар элдин талкуусуна түштү, урулду, согулду. Төш белгисин алып маданиятты алдыга жылдыра албайсыз, урматтуу министр мырза. Мен деле сөгүнөм, анда менин да төш белгимди алгыла", - дейт.

Ал эми алып баруучу Нурзат Токтосунова мырзалар жаңылып, катасын түшүнгөнүн айтат.

"Эки ырчыны 15 жылдан бери жакшы жагынан гана билчүмүн. Жаңылды, туура эмес болуп калды. Бирок 20 жылдык эмгектерин, сыйлыктарын албасак. Катуу кетпейли, сабак болсун баарыбызга".

Өзүн "кыргыздын деми" атаган, кийинчерээк ырчылыкка ыктаган Гүлзат Мамытбек дагы наамды алып коюуну туура эмес деп эсептейт.

Медиа эксперт Акмат Алагушев мамлекеттик сыйлыктан ажыратууну министрлик эмес, сот чечиши керек деген пикирин билдирди.

"Адамды сыйлыктардан, наамдардан же артыкчылыктарынан ажыратуу жөнүндө маселе сот тарабынан чечилиши керек. Бул үчүн ушул сыйлыктарга ээ болгон адам биринчи кезекте кандайдыр бир кылмыш үчүн жоопко тартылышы жана соттолушу керек. Күнөөлүү экенин далилдеген өкүм чыгышы кажет. Сыйлыктардан жана наамдардан ажыратууну сот аныктайт. Менин оюмча, маданият министри өзүнүн ыйгарым укуктарынан аша чапкан деп сотко даттанса болот. Адеп-ахлак жана этика маселелери бир чиновник же ведомство тарабынан чечилбеши керек болгон категория", - деген пикирин билдирди.

Мындан тышкары алып баруучулар Эльмара Турсуналиева, Назира Кадыева, Кундуз Казыбек кызы жана бир топ жөнөкөй жарандар ырчыларды наамынан ажыратпай эле койгон туура деген пикирлерин айтышты.

Ырчы Курал Чокоев чет элдик долбоорду кайталайм деп коомдун сынына кабылып, талкуу чордонунан түшө элек. Артисттин бул долбоорунун айрым үзүндүлөрүн маданият, маалымат жана туризм министри Нуржигит Кадырбеков аргасыздан көргөнүн, ырчы эмнеге мындайга барганын түшүнө албай жатканын айтып, элден кечирим сурады. Ошондой эле Курал Чокоев менен Кайрат Примбердиевдин чыгармачылыгына чектөөлөр киргизилерин айткан.

Ал эми "Марал" радиосу Курал Чокоев, "Кыргыз" радиосу Курал мырза, Кайрат Примбердиев менен иштешүүнү токтотуп, ырларын уктурбай турганын билдиришкен. Ага улай эле "Ош Пирим" ТРКсы Курал Чокоевдин ырларына бойкот жарыялай турганын маалымдаган.

Ырчы айтылып жаткан сындардын баарын кабыл аларын, кетирген каталарынын үстүнөн иштей турганын айтып, долбоорду тартууну улантарын билдирген. Кийинчерээк, ырчы долбоор токтотулганын, буга чейин интернет желесине жарыяланган видеолор өчүрүлөрүн айтып чыкты. Ал эми долбоордун коногу болгон шоу-бизнес өкүлдөрү өздөрүнүн пикирлерин билдиришкен.