Алмазбек Атамбаев ден соолугуна байланыштуу соттук отурумга катышкан жок. Отурум 18-январга жылдырылды

Бүгүн, 13-январда Бишкектеги Биринчи Май райондук сотунда мурдагы өлкө башчы Алмазбек Атамбаевге карата соттук териштирүү уланууда. Анда Алмазбек Атамбаев ден соолугуна байланыштуу сот процессине келбей калганын жактоочусу Замир Жоошев билдирди.

"Алмазбек Атамбаев соттук териштирүүнү анын катышуусу жок өткөрүүнү суранган арыз кат жазган" , - дейт жактоочу.

Биринчи Май райондук сотунун басма сөз кызматы төмөндөгүдөй маалымат таратты.

"Айыпталуучу Алмазбек Атамбаев ооруп жаткандыгына байланыштуу алынып келбегендиктен, бүгүнкү соттук отурум 18-январь саат 16:00гө жылдырылды" , - деп жазылат маалыматта.

Эске салсак, Биринчи Май райондук сотунун өндүрүшүндө Алмазбек Атамбаев өтүп жаткан 3 иш бар. Алар Кой-Таш окуясы, Бишкек ЖЭБин жаңылоо жана Кой-Таштагы Алмазбек Атамбаевдин жер тилкелери боюнча бардык иштер.