Башкы прокуратура: "Пандемияда 1 сом 50 тыйындык бахиланын ордуна 150 сомдугу алынган"

Башкы прокуратура Саламаттыкты сактоо министрлигинде жүргүзүлгөн текшерүүнүн жыйынтыгында жеке коргонуу каражаттарын сатып алууда бир катар мыйзам бузууларды аныктады. Бул тууралуу прокуратуранын басма сөз кызматы кабарлады.

"2020-жылдын 6-майында Саламаттыкты сактоо министрлигинин алдындагы Оорулардын алдын алуу жана мамлекеттик санитардык-эпидемиологиялык көзөмөл департаментинин комиссиясы негизсиз, мамлекеттик сатып алуулар жөнүндө мыйзамдарды бузуп, жеткирүүчүлөрдүн эң арзан баадагы коммерциялык сунуштарын четке каккандыгы аныкталды. Алар "Ф" ЖЧКсы менен жеке каражаттарды жеткирүү боюнча түздөн-түз келишим түзүүнү сунуш кылышып, медициналык кол каптарды жана бахилаларды жогорулатылган баада алышкан.

Коммерциялык сунуштардын шарттарын жана "Ф" ЖЧКсынын келишимин бузуу менен, техникалык шарттын талаптарына жооп бербеген 101 миң 300 түгөй кол кап жеткирилген", - деп жазылат билдирүүдө.

Мындан тышкары, келишимде каралган 1 сом 50 тыйындык 150 түгөй бахилынын ордуна, иш жүзүндө 1 миң 500 даана бахиланы жогорку баада, бир даанасын 150 сомдон алынгандыгы белгилүү болду.

Мындан улам, мамлекетке 5 миллион 175 миң 200 сом өлчөмүндө зыян келтирилген. Бул факты Башкы прокуратура тарабынан реестрге 320-берененин (Кызматтык абалынан кыянаттык менен пайдалануу) негизинде катталган.