Аксыдагы Дейрес-Сай айылында чек арада кайрадан жер талаш

Жалал-Абад облусунун Аксы районуна караштуу Дейрес-Сай айылындагы чек арада өзбек тараптын чек арачылары Кыргыз өлкөсүнүн жерине 15 метрдей кирип кеткенин аталган айылдын тургуну Исламбек Акбаров SUPER.KG порталына билдирди.

"Буга чейин деле бул жер талаш болуп келген. Анан эки тарап жолугуп, чек ара ошол жердеги жолдун кыры менен кетмей болгон. Кечээ 10-февралда өзбек тараптан чек арачылар келип мурдагы келишимди бузуп, биз жакка 15 метрдей кирип кеткен. Ошол үчүн жергиликтүү тургундар каршылык көрсөттү. Жетекчиңерди чакыргыла десек, алар жок деп баш тартышты. Биздин чек ара заставанын башчысын тоготпой коюшту. Анан айыл тургундары көбөйүп кеткен соң өзбек тараптын чек арачылары кетүүгө мажбур болушту. Азыркы учурда абал туруктуу. Кайра бүгүн келишкен жок. Өзбекстан тарап мамы орнотуу үчүн казган чуңкурларды толтуруп койдук",- дейт Акбаров.

Аталган маселе боюнча мамлекеттик чек ара кызматына маалымат алуу үчүн чалып, бирок байланыша алган жокпуз.