Мен көргөн бир күн: "Милиция десе эле эркек мүнөз, сүрдүү деп ойлошот. Түпкүлүгүбүздө назик жанбыз"

SUPER.KG порталы ар бир кесиптин ээлеринин иш учурундагы башынан өткөргөн кызыктуу, өмүр бою эсинен кетпей турган окуяларын баяндоону улантат.

Бул жолу бизге өзүнүн кызыктуу баянын Бишкек шаарынын Ленин РИИБинин тергөө кызматынын тергөөчүсү, милициянын ага лейтенанты Назик Майрамбекова айтып берет.

Каарманым өзү жаш болсо дагы кесибине байланыштуу ары кызыктуу, ары татаал окуяларды өткөргөн. "Көп жашаган эмес, көптү көргөн билет" деген сыңары Назик Майрамбекова бул тармакта 2018-жылдан тарта эмгектенип келет.

"Тергөөчү катары эң биринчи тинтүүгө чыкканым эч эсимден кетпейт. Бул окуя интернетке деле чыккан, көбү укса керек. Анда уюшкан кылмыштуу топтун мүчөлөрү унаалардын ичинен барсетка, акча, ар кандай буюмдарды уурдап кеткендери видеого түшүп калган. Бул факты боюнча мен тергөө жүргүзгөм, ошондо алардын батири табылып ал жакка тинтүүгө чыкканбыз. Эки батири бар экен, биринчисине барганда кылмышка тиешеси бар эч кандай далил заттар табылган жок. Баарын жыйнап, таптаза кылып кетишиптир. Экинчисине барганда камера менен киргенбиз, кийин камераны өчүргөнгө болбойт. Ошондо мен биринчи кирем, артыман камера менен бардык процессти баштан-аяк тартып турушат. Бир маалда текченин үстүндөгү куту башыма түшүп кетти, андан кийин колумду кыпчып алдым ушунун баары камерага түшүп жатты да. Кийин ал видеону соттор жана башка кызматкерлер көрөт. Ошол учурда күлкүлүү учурлар болгон.

Батирден көп нерсе таптык, баңгизат, уюлдук телефондор жана башка уурдап жүргөн буюмдар чыкты. Кыздардан жалгыз эле мен, эң кичинекейи дагы мен болуп алар мени олуттуу кабыл албай жатышабы деп ыңгайсыз болгом. Ошентип ал кылмышка шектүүлөр менен тергөө учурунда эки ай сүлөшүп, тыгыз иш алып бардык. Алардын бирөөсү буга чейин киши өлтүрүүгө шектелип соттолуп чыккан. Бул тергөөдө аябай психологиялык сокку алгам, оор болгон", - деп эстеди ал.

"Милиция айым десе эле эркек мүнөз, оңою менен күлбөгөн сүрдүү адам деп ойлошот. Бирок түпкүлүгүбүздө биз дагы бардык айымдардай эле назик жанбыз. Форма кийип жүргөн учурда кадимки айым катары сылык мамиле кылып коюшса, ичибизден ыраазы болуп калабыз", - деп сөзүн аяктады.