Сузакта изделип жаткан Дастан Кубатбеков табылды

Жалал-Абад облусунун Сузак районунда дайынсыз болуп изделип жаткан 25 жаштагы Дастан Кубатбеков табылды. Бул тууралуу SUPER.KG порталына Жалал-Абад ОИИБинин басма сөз кызматынан билдиришти.

Маалыматка ылайык, кайдыгер эмес жарандар тарабынан анын жүргөн жери аныкталган. Дастан адашып Бишкектеги “Манас” эл аралык аэропортуна барып калган.

"Ал жерден аны милиция кызматкерлери туугандарына өткөрүп беришкен. Учурда Дастан Кубатбеков туугандары менен биргеликте Сузак районуна кайтып келүүдө", - деп билдиришти маалымат кызматынан.

Белгилей кетсек, буга чейин Жалал-Абад облусунун Сузак районуна караштуу Таш-Булак айыл аймагындагы Арал айылынын тургуну 1996-жылы туулган Кубатбеков Дастан Замирбекович 16-февраль күнү саат 10:30 чамасында жашаган үйүнөн чыгып кеткен бойдон дайынсыз болуп, изделип жаткан.