Былтыр 4 миң 805 адам "В", "С" вирустук гепатит илдетине чалдыккан

Былтыр 4 миң 805 адам "В", "С" вирустук гепатит илдетине чалдыккан. Бул тууралуу Жогорку Кеңештин комитетинин жыйынында айтылды.

Анда “Кыргыз Республикасында вирустук гепатиттер оорусуна 2017-2022-жылдарга карата каршы күрөшүү стратегиясы” боюнча программасынын аткарылышы талкууга алынды.

Жыйында баяндама жасаган саламаттыкты сактоо министринин орун басары Мадамин Каратаев аталган программанын алкагында жети багыт боюнча иш жүргүзүлүп жатканын белгиледи. "Бул жаатта көйгөйлөр көп. Биринчиден, "В", "С" вирустук гепатиттерине каршы вакцина алуу үчүн 5 миллиард сомдон ашуун каражат керек. Экинчиден, гепатология борборун куруу да мерчемделген. Бирок коронавирус пандемиясына байланыштуу аталган максат ишке ашырылбай келет. Үчүнчүдөн, сулуулук салондору, тиш дарылоо жайлары сыяктуу коомдук жайлардагы абалды текшерүү боюнча тиешелүү мыйзамдарга өзгөртүү киргизүү аракети көрүлүүдө", - деди.