Кыргыз-Түрк достугу ооруканасы жөнүндөгү келишимдин ратификацияланганы боюнча кыргыз тарап расмий билдирүү күтүп жатат

Саламаттыкты сактоо жана социалдык өнүктүрүү министри Алымкадыр Бейшеналиев министр кызматына келген алгачкы күндөрүнөн баштап Бишкектеги мамлекеттик кыргыз-түрк достугу ооруканасынын ачылышын тездетүү маселесин жеке көзөмөлүнө алды. Бул тууралуу аталган министрликтин басма сөз кызматынан билдиришти.

Маалыматка ылайык, былтыркы жылдын 30-октябрында Саламаттыкты сактоо жана социалдык өнүктүрүү министри Алымкадыр Бейшеналиев Стамбул шаарында Түркия Республикасынын саламаттыкты сактоо министри Фахреттин Кожа менен жолугуп, келишимди ратификациялоону тездетүү маселелерин талкуулаган.

Андан кийин ушул жылдын 10-январында министр Бишкек шаарында Түркия парламентинин депутаттары менен жолугушту.

Министр 4-7-февралга чейин Түркия Республикасына болгон иш сапарынын алкагында Түркиянын саламаттыкты сактоо министринин орун басары Халил Элдемир, ошондой эле Түркия Улуу Улуттук жыйынынын төрагасынын орун басары Жалал Адан менен жолугушуу өткөрүп, Бишкек шаарындагы мамлекеттик Кыргыз-Түрк достугу ооруканасынын толук кандуу иштеши үчүн келишимди ратификациялоону тездетүү маселеси көтөрүлгөн.

11-февралда Түркия Республикасынын парламенти Бишкек шаарында 2018-жылдын 1-сентябрында кол коюлган Бишкектеги оорукананы ачуу, биргелешип башкаруу жана өткөрүп берүү, ошондой эле Кыргыз Республикасынын жарандарынын Түркияда медицина жаатында билим алуусу боюнча Кыргыз Республикасынын өкмөтү менен Түркия Республикасынын өкмөтүнүн ортосундагы макулдашууну ратификациялоо жөнүндө мыйзам долбоорун жактырды.

20-февралда мыйзамга Түркия Республикасынын президенти кол коюп, өкмөттүн расмий гезитинин беттеринде жарыяланды.

Учурда кыргыз тарап Кыргыз Республикасынын Тышкы иштер министрлиги аркылуу жогоруда аталган макулдашууну ратификациялоо боюнча ички процедуралардын аяктагандыгы жөнүндө түрк тараптын расмий билдирүүсүн күтүп жатат.