Ошто Мамлекеттик туу күнү белгиленди

Бүгүн, 3-мартта Ош шаарынын борбордук аянтында Кыргыз Республикасынын мамлекеттик туусунун кабыл алынгандыгынын 29 жылдыгына арналган майрамдык иш-чара болуп өттү. Бул тууралуу Ош шаардык мэриясынан билдиришти.

Ага Ош шаарынын мэри Таалайбек Сарыбашов, өкмөттүн Ош облусундагы ыйгарым укуктуу өкүлүнүн орун басары Ахматжан Махамадов, шаардык кеңештин төрагасы Жапарбек Ормонов, легендарлуу парламенттин депутаттары, мекеме-ишканалардын кызматкерлери, шаардыктар жана аскер кызматкерлери катышты.

"Мамлекеттик туу күнүн белгилеп жатып, жалпыңыздарды патриоттуулукка, ар намыстуулукка үндөп кетем. Туубуз элибиздин майрамдарында, салтанаттарында, улуттук аземдеринде желбиресин! Спорт чеберлерибиз, маданият кызматкерлерибиз, дегеле бүтүндөй Кыргыз жарандарыбыз башын бийик көтөрүп жеңиштерде желбиретишсин! Ылайым биздин туубуз кыргызстандыктарды бириктирген сыймыктуу символ катары түбөлүккө жашасын!”, - деди Сарыбашов.

Иш-чаранын жүрүшүндө жоокерлер шаардын борбордук аянтына мамлекеттик тууну көтөрүштү.

Ошондой эле Ош ШИИБинин жана Ош гарнизонунун кызматкерлеринин жүрүшү уюштурулду.

Белгилей кетсек, мамлекеттик тууну легендарлуу парламент эки ай талкуулап, 1992-жылдын 3-мартында кабыл алган. Быйыл Кыргыз Республикасынын туусуна 29 жыл толду.