"Жакшы сүйлөп, жакшы отура элек". Курсан Асановдун жубайы суракка чакырылды

Ички иштер министринин мурдагы орун басары Курсан Асановдун жубайы Күлнара Үсөнканова инсульт алган, бирок аны суракка чакыруу уланууда. Бул тууралуу SUPER.KG порталына жактоочу Таалайгүл Токтакунова билдирди.

"Инсульт болуп азыр ооруканадан үйгө чыгарылды. Бирок ден соолугу жакшы боло элек. Инсульттан кийин калыбына келүү көп убакытты талап кылат, билесиздер да. Жакшы сүйлөп, жакшы отура элек. Бирок каржы полициясы, УКМК да суракка чакырып жатат. Азыр ден соолугуна байланыштуу УКМКнын имаратына жетмек тургай эшикке чыкканга дагы мүмкүнчүлүгү болбой жатат. Тергөөчүлөргө айтсак дагы көнбөй жатышат", - деди Токтакунова.

Буга чейин Курсан Асановдун жубайы Күлнара Усенканованын УКМКда сурак берип жатып, эс-учун жоготкондугу тууралуу маалымат тараган.

Эске салсак, буга чейин президенттике талапкерлердин биринин жубайы алдамчылыкка шектелип, УКМКга суракка чакырылгандыгы боюнча маалымат тараган. Кийин аны Курсан Асановдун жубайы экендигин айрым маалымат булактары жазып чыгып, адвокат Таалайгүл Токтакунова бул боюнча да өзүнүн билдирүүсүн жарыялаган.