"Тажикстандагы 5 жаран алмашуу жолу менен өлкөгө кайтарылат" дейт өкүлчүлүк

26-февралда "Тажикстандын күч түзүмдөрү тарабынан кармалган бир тууганым дагы деле өлкөгө кайтарыла элек, бул жаатта биздин бийлик алсыздык кылып жатат. Убада бергени менен андан майнап чыкпай, менин кабыргам кайышып жатат", - деген Гүлайым Бурканова SUPER.KG порталына кайрылган. Ал инисин чыгарууга эч кандай аракет болбой жатканын, андан 10 күндөн бери дайын жок экенин айтып, кайрылуу жасаган.

Ал эми бүгүн, 4-мартта Досматбек Орозов иниси Довлатбек Орозовдон дайын жок экенин, ал эмне ичип, эмне жеп, кандай жашап жатканынан кабатыр экенин айтып, кайрылды.

Айтымында, өкмөттүн Баткен облусундагы өкүлү Өмүрбек Суваналиев көйгөй айтууга барган жарандарды кабыл албай жатат.

"Иним Довлатбек Орозовдон дагы деле дайын жок. Ал өзүңүздөргө белгилүү болгондой, Лейлек районунун мал базарына барып мал алып, кайра кайтып келе жаткан жеринен колго түшүрүлгөн. Андан кийин аларды Тажикстанга алып кирип кетишкен.

Өкмөт өкүлү кармалгандар чыгарылат деп айткан, бирок азыркыга чейин чыгарыла элек. Кечээ ага жолугууга барсак, бизди кабыл албай койду. 75 жаштагы апам бар, ал кыжаалат болуп уктабай жатат. Бүгүн да эртең менен өкмөт өкүлүнө жолугуу үчүн кетти", - деди Орозов.

Маселе боюнча SUPER.KG порталы тиешелүү тараптарга тынымсыз кайрылганы менен жарытылуу жооп ала албай жатат. Мамлекеттик чек ара кызматы бул маселе такталып жатканын, ага убакыт керек экенин билдирип тим болду.

Ал эми өкмөттүн Баткендеги өкүлчүлүгүнүн басма сөз катчысы Чолпон Бердигулова билдиргендей, өкмөт өкүлү ар бир жаранды өзүнчө кабыл алууга кээде убактысы болбой калат. Айтымында, жакынкы арада бул маселе жарандарды алмашуу жолу менен чечилет.

"Өкмөт өкүлүнүн жарандарга берген убадасы жалган эмес, буга чынында убакыт керек болуп жатат. Буга чейин эки тарапта макулдашуу, жолугушуу жана сүйлөшүүлөр болуп келген. Кармалган жарандар барымтада эмес, коңшу өлкөнүн күч түзүмдөрү жарандарды мыйзам бузду деген жүйө менен кармап кеткен. Ал эми биз келген жарандарды болушунча кабыл алып жатабыз.

Өкмөт өкүлү ар бир жаранды өзүнчө кабыл албай калышы мүмкүн, анткени башка жумуштар менен алектенип калган да учурлар болот. Буюрса жарандар алмашуу жолу менен кайтарылат. Анткени бизде да коңшу өлкөнүн 15тей кармалып турган жараны бар. Тийиштүү иш-аракеттер жүрүп жатат", - деди маалымат катчы.