Ак калпак кийген аталар, элечекчен апалар. "Ала-Тоо" аянтындагы иш-чарага кимдер катышууда?

Бишкектин "Ала-Тоо" аянтында 5-март Ак калпак күнүнө карата иш-чара өтүп жатат. Анда ак калпак кийген аталар, элечекчен апалар, байыркы кыргыз жоокерлеринин аскердик кийимдерин кийген жигиттер, үкү топу кийген бийкечтер аянттын көркүнө көрк кошуп, иш-чара салтанаттуу жүрүүдө.

Иш-чаранын башында Маданият, маалымат, спорт жана жаштар саясаты министри Кайрат Иманалиев сөз сүлөп, 5-март Ак калпак жана улуттук кийимдер күнү менен куттуктады.

"Ак калпак күнүн белгилеп келе жатканыбызга 10 жыл болду. Ылайым биздин аталарыбыздын, апаларыбыздын башынан ак калпагы, элечеги түшпөсүн. Улуттук кийимдерибиз кыргыздын кыргыз экендигин таанытып, кыргыздын улуттук ар-намысын козгоп, дүйнөгө ушундай барктуу, салттуу, нарктуу улут катары эл бар экенин таанып турсун", - деди Кайрат Иманалиев.

Аталган майрамды уюштурган режиссёр Рысбек Жабиров сөз кезегин алып, элди майрамы менен куттуктады. Андан соң манасчылар Дөөлөт Сыдыков, Самат Көчөрбаев манас айтып, акындар улуттук баалуулуктар тууралуу ырларын төгүштү.

Белгилей кетсек, быйыл Ак калпак күнүн белгилеп келе жатканыбызга 10 жыл толду.