Аксыда алты адамдын өмүрүн алган уулануу. "Айылдык кеңешке депутаттыкка талапкерлигин койгон аял тургундарды сый-чайга чакырган" дейт айыл өкмөт башчы

Жалал-Абад облусунун Аксы районуна караштуу Кара-Суу айылынын айыл өкмөт башчысы Дөөлөтбек Миңбаев SUPER.KG порталына жергиликтүү тургундардын спирт ичимдигине ууланганы боюнча маалымат берди. Анын айтымында, айылдык кеңешке талапкерлигин коюп жаткан Бурулкан Эргешова аттуу аял тургундарга сый-чай берген.

Миңбаевдин айтымында, уулануудан 6 адам каза болду, азыркы тапта дагы бир адамдын абалы оор.

"Жалпы 18 адам болгон. Алардын алтоосун азыр текшерип жатат. Ал эми 5 адам медициналык жардам алып үйлөрүнө чыгарылган. Айылдык кеңешке талапкерлигин коюп жаткан аял чай берип, алар спирт ичимдигин суу менен аралаштырып ичишкен. Ал аялдын өзүнүн дарыканасы бар. Азыр уулангандарга экспертиза жүргүзүлүп жатат. Кечке чейин эмнеден ууланышканы анык болот", - деди Миңбаев.

Ал эми айылдын атын атагысы келбеген тургунунун айтымында, Бурулкан Эргешова Жогорку Кеңештин депутаты Алмазбек Эргешовдун бир тууганы. Биз маалыматтарды тактоо үчүн Эргешовго байланышуу аракетибиз ишке ашкан жок. Азырынча бул маалыматтарды айыл өкмөт атын атаган адамдар тастыктай элек. SUPER.KG порталы экинчи тараптын айткандарын угуп жарыялоого даяр.

Буга чейин Саламаттыкты сактоо министрлиги жогорудагы окуя боюнча маалымат тараткан.

"Кара-Суу айылынын 19 тургуну кафеден түштөнүшкөн. Бейтаптардын айтымында, алар салат, беш бармак жана сууга аралаштырылган спиртти ичишкен.

Учурда массалык уулануу боюнча эпидемиологиялык тергөө башталып, уулангандар менен чогуу тамактанган башка адамдарды аныктоо иши жүргүзүлүүдө. Кошумча маалымат эпидемиологиялык текшерүүнүн жыйынтыгы менен берилет", - дешкен министрликтен.