Экономикалык кызматташтык уюмунун 14-саммити болуп өттү

Бүгүн, 4-мартта президент Садыр Жапаров Экономикалык кызматташтык уюмунун 14-саммитинин видеоконференция форматында өткөн ишине катышты. Бул тууралуу президенттик аппараттын басма сөз кызматынан билдиришти.

Иш-чарага Түркия президенти Режеп Тайип Эрдоган, Түркмөнстан президенти Гурбангулы Бердимухамедов, Ооганстан президенти Ашраф Гани, Азербайжан президенти Ильхам Алиев, Иран президенти Хасан Роухани, Казакстан президенти Касым-Жомарт Токаев, Тажикстан президенти Эмомали Рахмон, Өзбекстан президенти Шавкат Мирзийоев, Пакистандын премьер-министри Имран Хан жана ЭКУ башкы катчысы Хади Солейманпур катышты.

Садыр Жапаров өз сөзүндө ЭКУга мүчө-өлкөлөрдүн лидерлерин коронавирус пандемиясынан келип чыккан экономикалык жана социалдык кризистен чыгуу үчүн биргелешкен чараларды көрүүгө чакырып, уюмдун бул багытта жигердүү иш алып барууга бардык мүмкүнчүлүктөрү бар экендигин баса белгиледи.

Ошондой эле саммитте биргелешкен экономикалык, гуманитардык жана соода кызматташтыгын күчөтүү боюнча чаралар талкууланды.