"Өз милдеттерин толук аткарбай, жазалоочу гана орган болуп калды". Премьер-министр Финполду жоюу тууралуу буйрук чыгарды

Өкмөткө караштуу Экономикалык кылмыштарга каршы күрөшүү боюнча мамлекеттик кызматы жоюлду. Тиешелүү жарлыкка премьер-министр Улукбек Марипов кол койгонун өкмөттүн басма сөз кызматынан билдиришти.

"Расмий маалыматтарга ылайык, көмүскө экономиканын деңгээли 130 миллиард сомду же ички дүң продукциянын 23,6 пайызын түзөт. Ал эми көз карандысыз эксперттер белгилегендей көмүскө экономиканын көлөмү 24 пайыздан 43 пайызга чейин жетет. Бул Финполдун милдеттеринин толук аткарылбай жаткандыгынан кабар берет.

Мындан сырткары көз карандысыз эксперттер жана бизнес коомчулугунун өкүлдөрү тарабынан Каржы полициясынын ишмердүүлүгүнө нааразычылыктар айтылып, аталган мекеменин коррупциялашкандыгы жана жеке ишкерлердин ишмердүүлүгүнө мыйзамсыз кийлигишүүлөр болуп жаткандыгы айтылууда", - деп жазылат маалыматта.

"Экономикалык кылмыштар менен күрөшүү тармагындагы ыйгарым укуктуу органдар" тууралуу мыйзамдын 3-статьясына ылайык, Каржы полициясынын милдети өлкөнүн экономикалык коопсуздугун камсыз кылуу, божомолдоо жана алдын алуу болуп саналат. Бирок бүгүнкү күндө Финпол жогорку саналган милдеттерин аткарбай, бир гана жазалоочу орган болуп калды", - деп айтылат маалыматта.