Аксыдагы уулануу. "Атам спирт ичимдигин ичип, бир суткага жетпей каза болуп калды" дейт маркумдун баласы

Аксы районуна караштуу Кара-Суу айылында спирт ичимдигине ууланып каза болгондордун арасында 62 жаштагы Раимберди Нээталиев бар. Маркум буга чейин маалымат булактарында айтылган айылдык кеңешке депутаттыкка талапкерлигин койгон аялдын сый-чайына барган эмес.

Ал дарыканадан дарылыкка деп ичимдик сатып алып, аны ичкенден кийин бир суткага жетпей каза болуп калган.

Бул тууралуу маркумдун уулу Чубак Раимберди уулу SUPER.KG порталына айтып берди. Айтымында, атасы спирт ичимдигин башка жакка караганда баасынын арзандыгына карап сатып алган.

“Менин атам 1958-жылы туулган, 62 жашта болчу. Башкалардан айырмаланып атам көпчүлүк менен чай ичкени барган эмес. Ал алкоголдук ичимдикти дарыканага барып, дарылыкка деп сатып алган. Айылда Бурулкан Эргешовага таандык дарыкана бар. Азыр ал дарыканада мөөнөтү өтүп кеткен спирт ичимдиктери сатылган деп айтылып жаткан маалымат туура жана тастыкталган маалымат. Себеби атам дарыканадан спирт ичимдигин арзандыгына карап, 100 сомго сатып алган экен. Бул спирт ичимдиктери мөөнөтү өтүп кеткендиктен арзан сатылган.

Атам ичимдикти дарылыкка алган, анткени буга чейин да дарылыкка колдонуп жүрчү. Ал эми чайга чакырылып, чай ичкендердин арасынан да адамдар ошол эле ичимдиктин айынан көзү өтүп кетти. Топтолгондорду сыйлаган адам чай ичип олтургандарга "таза спирт, Орусиядан келди" деп айтып, коноктогон экен. Аны билбеген байкуштар ичип алышат. Ал эми кээ бир жактарда каза болгон жарандар тамакка ууланды деп да айтылып жүрөт.

Бирок айтып коёюн, бул маалымат чындыкка дал келбейт. Ал жерде чай ичкендердин арасында спирт ичимдиктерин ичкендер гана каза болуп жатат. Ал эми аларды ташыган айдоочулар, спирт ичимдигин ичпегендер эч нерсе болгон эмес. Алар тамак жешкен, эгер тамактан ууланган десек, анда алар да каза болмок да. Бул окуя боюнча айылда күбөлөр толтура.

Атам спирт ичимдигин ичкенден кийин абдан кыйналып, ашказаны ооруп, таң атканча уктабай кыйналып чыккан. Биз ооруканга алып баралы десек, "сакайып кетем" деп такыр болбой койгон. Өлүм күтүлбөгөн нерсе экен, атабызды каратып туруп бир сутканын ичинде ажалга алдырып жибердик.

Атам түнү менен кыйналып чыгып, саат эртең мененки 11лерде үзүлүп кетти.

Азыркы тапта айыл тынчый элек. Негизи каза болгондор алты адам эмес, андан көп. Чай ичкендерден эле алты адам кайтыш болуп жатат. Андан сырткары дарыканадан спирт ичимдигин сатып алгандар дагы бар.

Азыр тургундар "эски товарды эмнеге элге сатат?" деп дарыкана ээсине нааразы болуп жатышат. Айылда "дарыкана ээси лабораториядан тамактан ууланган деген тастыктама чыгартып алыптыр" деп айтып жатышат. Бирок адамдар тамактан ууланса, анда баары каза болуп калмак да. Айыл эли "дарыкананы өрттөйбүз" деп ачууланып жатышат.

Азыр биз да атабызды жоготуп, кабыргабыз кайышып турат. Баары тынчыса, тиешелүү жерге кайрылып, сүйлөшөбүз. Азыр дарыкана ээсин табуу мүмкүн эмес, аны азыр кошунасы да таба албай жатат”, - деди Раимберди уулу.