Бишкекте бир апта ичинде жол эрежесин бузган 277 чет өлкөлүк унаа аныкталды

Бир апта ичинде 277 жол эрежелерин бузган чет өлкөлүк номерлүү унаалар аныкталды. Бул тууралуу Милициянын кайгуул кызматынын басма сөз кызматынан билдиришти.

Маалыматка ылайык, 26-февралдан 4-мартка чейин каттоо мөөнөтү өтүп кеткен, түзүлгөн протоколдор үчүн айып пулдарын өз убагында төлөбөгөн, ошондой эле ар кандай жол эрежесин бузган чет өлкөлүк жана транзиттик номерлүү 277 авто унаа аныкталды.

"Алардын ичинен 65 - Орусияныкы, 6 - Арменияныкы, 9 - Азербайжандыкы, 182 - транзиттик номерлер, 15 жана башка чет өлкөлүк номерлүү унаалар. Булардын баарына бузуулар тууралуу кодексинин беренелеринин негизинде тиешелүү протоколдор толтурулду. Анын ичинен 19 чет өлкөлүк унаалар ар кандай багытта жол эрежелерин бузгандыгы үчүн убактылуу токтотуучу короо жайына киргизилди", - деп айтылат билдирүүдө.

Ошондой эле Коопсуз шаар долбоорунун алкагында коюлган видео көзөмөлдөрдөн жашынып же видео көзөмөл жазбайт деген түшүнүк менен жогорку ылдамдыкта айдаган айдоочуларга карата текшерүү жана чара көрүү иштерин улантарын кошумчалашты.