Бишкекте казак акыны Абай Кунанбаевдин 175 жылдыгы белгиленет

Бишкекте казак жазма адабиятына негиз салган улуу акын Абай Кунанбаевдин 175 жылдыгына карата салтанат өтөт. Бул тууралуу Маданият, маалымат, спорт жана жаштар саясаты министрлигинин басма сөз кызматынан билдиришти.

Ага ылайык, акындын 175 жылдыгына карата 10-мартта Абдылас Малдыбаев атындагы Кыргыз улуттук академиялык опера жана балет театрында "Миң таазим Абай акынга" аттуу чоң программадагы концерт уюштурулат.

"Иш-чарага Казакстандын маданият жана спорт министри Актоты Раимкулова жана Өзбекстандын маданият министринин орун басары Олимжон Мирзаев катышат. Анда Кыргыз өлкөсүнүн, Казакстан, Өзбекстан, Түркия жана Түркмөнстан мамлекеттеринин өнөр адамдары талантын тартуулашат. Концерт саат 18:30да башталат", - деп жазылат маалыматта.

Абай Кунанбаев - казак элинин улуу акыны, философ-гуманист, композитор, көркөм сөз өнөрүнүн зергери.