"Тасма, клип тартууга эң мыкты аймак". Ош шаары индиялыктардын кызыгуусун жаратты

Ош шаары Болливуд тасмалары үчүн эң мыкты аймак боло алат. Мындай пикирин Индиянын Кыргыз өлкөсүндөгү элчиси Алок Амитабх Димри Ош шаарынын вице-мэри Замир Юсупов менен болгон жолугушуусунда билдирди.

Анда тараптар биргелешкен долбоорлорду жана программаларды ишке ашыруу тууралуу талкуулашты.

"Мен Ош шаарын аябай жакшы көрөм, бул жакка бешинчи жолу келип жатам. Бул жерге келгенде өзүмдү жергиликтүү тургундай сезем. Биз шаардын, анын ичинде социалдык жана маданий чөйрөнүн өнүгүшүнө салым кошууга даярбыз. Кыргыз өлкөсүнүн түштүк тарабынын уникалдуу жаратылышы, тоолуу ландшафттары жана шалбаалары, көлдөрү жана сонун аба ырайы көчмөндөр маданияты менен айкалышып, Болливуд кинотасмалары жана клиптери үчүн мыкты талаа боло алат. Индияда абдан популярдуу болгон "Турбааз" тасмасы Кыргыз жергесинде тартылган", - деди элчи.

Ошондой эле элчи билим берүү жаатында ITEK техникалык алмашуу программасынын алкагында, Индия тарап келечектүү жаштарды билим берүү долбоорлору менен колдоого даяр экендигин баса белгиледи.

Өз кезегинде Замир Юсупов Ош шаарынын мэриясы шаарды өнүктүрүүгө багытталган бардык демилгелерди колдоого даяр экендигин баса белгиледи.

"Биз Ош шаарына Индиянын киноиндустриясынын долбоорлорун тартуу боюнча долбоорлорду карап чыгууга даярбыз", - деди вице-мэр.