Бишкекте 9-кабаттан кулап түшкөн 18 жаштагы жигитке операция жасалды

Бишкекте 18 жаштагы жигит курулуш иши жүрүп жаткан имараттын 9-кабатынан кулап түшүп, Бишкектеги травматология жана ортопедия илим изилдөө борборунда жатканы маалым болгон. Окуя 1-мартта Бишкектеги Токомбаев көчөсүндө катталган.

12 күндөн бери ооруканада жаткан бейтаптын абалын билүү үчүн Травматология жана ортопедия илим изилдөө борборунун маалымат кызматына байланыштык.

"18 жаштагы бейтап ичинен жабык жаракат алган, боорунун оң жагы, жоон ичегиси жарылып, ичине кан куюлган, гематома, көтөн чучуктан жаракат алган. Баш мээси чайкалган. Ага операция жасалып, боору тигилген. Дагы операция жасалары күтүлүүдө. Учурда бейтап хирургия бөлүмүндө жатат", - дешти мекемеден.

Эске салсак, Бишкектеги Токомбаев көчөсүндө 14 кабаттуу үйдүн курулуш иштери жүрүп жатканда 9-кабаттан жумушчу кулап түшкөнүн Октябрь РИИБинин басма сөз кызматынан билдиришкен.