Бишкекке 9 кабаттуу медицина борбору курулат

Бишкек шаарына Катар өлкөсү 9 кабаттуу медицина борборун куруп берет. Мындай маалыматты Травматология жана ортопедия илим изилдөө борборунун директору Сабырбек Жумабеков социалдык тармактагы баракчасына жазды.

Анын билдирүүсүндө, Катар өлкөсү курулуш иштери тез башталышына кызыкдар жана каржылоого толугу менен даяр.

"Катар мамлекетинин Кыргыз өлкөсүндөгү элчиси Абдулла бин Ахмед Аль-Сулайити мырза менен жолугушуу өткөрдүк. Жолугушуу учурунда элчи мырза Катар өкмөтү Бишкек Травматология жана ортопедия борборунун жаңы тогуз кабаттуу заманбап технологиялар менен жабдууланган жаңы имаратынын курулушуна багытталган 9 миллион 240 миң доллар өлчөмүндө каржылоо болгонун билдирди. Бул каражат 100 пайыз грант түрүндө берилет. Насыя эмес, кайтарбайбыз", - деп жазды ал.

Ал эми жер маселесин Бишкек шаардык мэриясы чечип берерин билдирген.