Бишкек-Ош унаа жолу жүк ташуучу унааларга убактылуу жабылат

Бишкек-Ош жолу жүк ташуучу унааларга убактылуу жабылат. Бул тууралуу Жол кыймылынын коопсуздугун камсыздоо башкы башкармалыгынан билдиришти.

Өзгөчө кырдаалдар министрлигинин гидрометеорология боюнча агенттигинин маалыматына ылайык, 16-марттан 18-мартка чейин Бишкек-Ош унаа жолунун тоолуу аймактарында Төө-Ашуу жана Ала-Бел ашууларында кар жаашы күтүлөт.

Жол кырсыктарын алдын алуу, адамдардын өлүмүнө жол бербөө жана материалдык зыян келтирилген жол кырсыктарынын санын азайтуу максатында жол кыймылынын коопсуздугун камсыздоо башкы башкармалыгы тарабынан профилактикалык иш-чаралар жүргүзүлөт.

Ага байланыштуу 17-март күнү эртең мененки саат 06:00дөн кечки саат 22:00гө чейин Бишкек-Ош унаа жолунун аталган бөлүгүндө оор жүк ташуучу унаалардын кыймылына чектөө киргизилет. Айдоочулар туура түшүнүү менен кабыл алып, профилактикалык иш-чараларды жүргүзүү учурунда жогорудагы багыт боюнча пландаштырылган кыймылын кийинкиге калтырууну суранат.