Дүйнөлүк банк: "2021-жылы Кыргыз өлкөсүндөгү жакырчылыктын деңгээли 35 пайызга чейин жетиши мүмкүн"

2021-жылы Кыргыз өлкөсүндөгү жакырчылыктын деңгээли 35 пайызга чейин жетиши мүмкүн. Бул тууралуу журналисттерге Кыргыз өлкөсүндөгү Дүйнөлүк банктын кеңсесинин башчысы Навид Хасан Накви билдирди.

Маалыматка ылайык, өлкөнүн экономикасынын абалы пандемия башталганга чейин эле кооптонууну жараткан. Расмий маалыматтарга ылайык, 2019-жылы өлкөдөгү калктын болжол менен 20 пайызы жакырчылыктын чегинде жашаса, 60 пайызга жакын жашоочулар аярлуу катмарга киришкен.

"2020-жылы өлкөнүн экономикасы 8,6 пайызга төмөндөдү. Бул процесс ошондой эле улуттук валютанын АКШ долларына карата 19 пайызга төмөндөшү менен коштолду. Экономика үчүн негизги шоктордун бири 9,7 пайыз деңгээлиндеги инфляция дагы болду. Ушундан улам жакырчылыктын деңгээли 31 пайызга чейин жетти. 2021-жылга карата божомолдор боюнча, ал дагы 4 пайызга өсүп, 35 пайызга чейин жетиши мүмкүн", - дейт сандарга таянган Навид Хасан Накви.