500 тоогу күйүп кеткен фермер аял: "Эки баламды ушул ишкерлик менен багып келе жаткам"

Баткендин Кызыл-Кыя шаарында сарай өрттөнүп 350 тоок, 150 жөжө күйүп кеткен. SUPER.KG порталы тооктору күйүп кеткен фермерге байланышып көрдү. Тоок фермасын эже-сиңди ачып, акыркы үч жылдан бери балдарын багып келе жатышкан. Фермер Мафтуна Шергазиева өрт бүгүн, 17-март күнү түнкү саат 03:30 чамасында башталганын айтат.

"Түнкү саат 03:30 чамасында башталыптыр. Биз ал убакта уктап жаткандыктан өзүбүз дагы кеч билип калдык. Өрт электр зымдарынын чукул туташуусунан келип чыккан. Биз кеч билип калгандыктан, ӨКМ келгиче эле бардык тооктор күйүп кеткен.

Акыркы 3 жылдан бери эжем экөөбүз ушул ишкерлик менен алектенип келгенбиз. 60 миң сомдой чыгымга учурадык. Өзүм жолдошум менен ажырашып кеткем, 2 балам бар. Ушул ишкерлик менен балдарымды багып келгем. Негизи тоок бизнесинен жакшы эле киреше тапса болот.

Кимден көмөк сурамак элек. Эми кайра бизнести ордуна тургузамбы, билбейм, карап көрөбүз. Башыбызга жазылган иш экен да", - деди Шергазиева.