Орусиянын колдоосу менен өлкөдө мобилдүү китепканаларды уюштуруу мерчемделүүдө

Өлкөдө мобилдүү китепканаларды уюштуруу пландаштырылууда. Бул тууралуу Тышкы иштер министрлигинин басма сөз кызматынан кабарлашты.

Белгилүү болгондой, 17-мартта Кыргыз Республикасынын Орусиядагы элчиси Гүлнара-Клара Саматтын Роскызматташтыктын жетекчиси Евгений Примаков менен жолугушуусу болуп, бир катар долбоорлор талкууланды.

"Гүлнара-Клара Самат маданий-гуманитардык кызматташтыкты өнүктүрүү боюнча Кыргыз өлкөсүндөгү жаштардын жана эксперттик чөйрөлөрдүн катышуусунда интеллектуалдык жана дискуссиялык аянтча түзүү демилгесин көтөрдү. Орусия Кыргыз жергесинде мобилдүү китепкана уюштуруу боюнча элчиликтин сунушуна кызыгуусун билдирди. Роскызматташтык китеп фондун камсыздоо жана көчмө китепкананы жабдуу маселесин кароого даяр. Кыргыз мамлекетинин алыскы калктуу конуштарында билим берүүчү кинотасмаларды көрсөтүү үчүн көчмө кинотеатрдын иштеши жөнүндө маселе изилденет.

Ошондой эле Роскызматташтык Кыргыз жергесиндеги кесиптик-техникалык училищеде кыргызстандыктар үчүн IT технологиялар жаатында окутуу курстарын өткөрүү мүмкүнчүлүгүн дагы карап чыгат", - деп айтылат билдирүүдө.