Бишкекте Нооруз майрамын өткөрүүгө чектөөлөр киргизилди

Борбор калаада Нооруз майрамын өткөрүүгө чектөөлөр киргизилди. Бул тууралуу Бишкек шаардык мэриясынын басма сөз кызматынан билдиришти.

Билдирүүгө ылайык, мындай чектөөлөр туруксуз эпидемиологиялык кырдаалды эске алуу менен коронавирус инфекциясынын жайылышынын алдын алуу максатында кабыл алынды.

"Туруксуз эпидемиологиялык кырдаалды эске алуу менен Бишкек шаарынын мэриясынын алдындагы шаардык эпидемияга каршы жана эпизоотияга каршы комиссия Нооруз майрамына карата массалык иш-чараларды өткөрүүдөн баш тартууну чечти. Ушуга байланыштуу райондун акимдерине санитардык-эпидемиологиялык эрежелердин сакталышына көзөмөлдү күчөтүү тапшырылды", - деп жазылат маалыматта.

Мамлекеттик санитардык-эпидемиологиялык көзөмөлдөө борбору тарабынан 2021-жылдын январь айынан 18-мартка чейин Бишкек шаарында коронавирус инфекциясы жана жугуштуу пневмония менен катталгандардын саны 2 миң 551 түздү.