Бишкек шаардык мэриясында калаага жылуулук берүүнү токтотуу маселеси каралды

Бишкек жылуулук борборунда борбор калаанын турак-жай коммуналдык чарба иштери боюнча вице-мэри Жамалбек Ырсалиевдин катышуусунда жыйын болуп өттү. Бул тууралуу шаардык мэриянын басма сөз кызматынан билдиришти.

Билдирүүгө ылайык, жыйында борборго жылуулук берүүнү токтотуу тууралуу талкуу болду.

"Кыргызгидрометтин маалыматына ылайык, жакынкы күндөрү, атап айтканда 26-марттан 2-апрелге чейин туруксуз аба ырайы күтүлүүдө. Бишкек шаардык мамлекеттик санитардык-эпидемиологиялык көзөмөлдөө борбору учурда шаарда коронавирус жана ОРВИ менен ооругандардын саны көбөйүп жаткандыгына байланыштуу жылуулукту өчүрүүнүн убактысын узартууну сунуштаган. Калаадагы жылуулукту өчүрүү маселеси эпидемиологиялык кырдаалды эске алуу менен кайрадан 2-апрелде каралат.

Эске сала кетсек, калаадагы жылуулук берүү абанын орточо температурасы беш күн катары менен +8 градустан жогору болгондо өчүрүлөт", - деп жазылат маалыматта.