Бишкек мэриясы: "Аккула" ипподромун куруу долбоору боюнча ишти токтотуу жөнүндө буйрук берилген"

Бишкек шаарынын вице-мэри Азамат Сагындык уулу менен болгон жолугушуунун протоколуна ылайык, 2020-жылдын 17-декабрында "Аккула ипподромун куруу" долбоору боюнча ишти токтотуу жөнүндө буйрук берилген. Бул тууралуу SUPER.KG порталына Бишкек шаардык мэриясынын басма сөз кызматынан билдиришти.

Маалыматка ылайык, 2020-жылы Аккула ипподром объектиси боюнча Бишкек шаардык мэриясынын капиталдык курулуш башкармалыгы, Бишкек шаардык мэриясынын көрсөтмөсү боюнча, жаңы ипподромдун курулушун долбоорлоо иштерине техникалык тапшырма даярдаган.

"Долбоорлоо иштеринин баасы болжол менен 19 миллион сомду түзүп, курулуш иштерине 2 жолу тендер жарыяланган. Биринчи сынак катышуучулардын келбегендигине байланыштуу болгон эмес.

Экинчи сынак талаптарга жооп берген катышуучулардын жоктугунан улам өткөн жок. Андан ары бюджеттин киреше бөлүгүнүн жоготулгандыгына байланыштуу, Бишкек шаарынын мэриясынын жетекчилигине долбоорду бюджеттик каражаттардын эсебинен ишке ашырууну токтото туруу жана Аккула ипподромунун долбоорун мамлекеттик-жеке менчик аркылуу ишке ашыруу мүмкүнчүлүгүн карап чыгуу тапшырылган.

Анын негизинде Бишкек шаарынын мэриясы Экономика министрлигинин алдындагы МЖӨ борбору менен биргеликте Аккула ипподромун куруу үчүн менчик ээлерин тартуу боюнча сынак жарыялаган.

Андан кийин протоколго ылайык, "Аккула ипподромун куруу" долбоору боюнча ишти токтотуу жөнүндө буйрук берилген", - деп айтылат маалыматта.