Кыргыз-Өзбек чек арасын делимитациялоо боюнча кол коюлган протоколдун жыйынтыгы боюнча түшүндүрүү иш-чаралары жүргүзүлөт

Улуттук коопсуздук мамлекеттик комитетинин төрагасы Камчыбек Ташиев өкмөттүн чек ара маселелери боюнча атайын өкүлү Назирбек Бөрүбаев менен биргеликте Кыргыз-Өзбек мамлекеттик чек арасын делимитациялоо жана демаркациялоо боюнча өкмөттүк делегациялардын кеңешмесинин жыйынтыгы боюнча маалыматтык-түшүндүрүү иш-чараларын жүргүзөт. Бул тууралуу өкмөттүн басма сөз кызматынан билдиришти.

Тактап айтканда, түшүндүрүү иш-чараларынын планына ылайык, өкмөттүк делегация башчысы жана атайын өкүл Кыргыз Республикасынын Баткен, Жалал-Абад, Ош облустарынын чектеш аймактарына барышып, анда калк менен жолугушуу өткөрүп, кол коюлган протоколдун жыйынтыктарын кеңири түшүндүрүп беришет.

Планга ылайык, 30-мартта саат 11:00дө Бирлик айыл аймагынын административдик имаратында Баткен облусунун Кадамжай районуна караштуу Бирлик айылынын жергиликтүү калкы менен "Чечме" участогу боюнча жолугушуу өтөт.

30-мартта саат 17:00дө Өзгөн райондук административдик имаратында Кемпир-Абад суу сактагычы боюнча Ош облусунун Кара-Суу жана Өзгөн райондорунун, ошондой эле Жалал-Абад облусуна караштуу Сузак районунун калкы менен жолугушуу өтөт.

31-мартта саат 14.00дө Ала-Бука райондук административдик имаратында Жалал-Абад облусунун Ала-Бука жана Аксы райондорунун жергиликтүү калкы менен тилкелер боюнча жолугушуу өтөт.