УКМК: "Күйүүчү-майлоочу материалдарды ташуу үчүн салондоруна контейнер орнотулган автоунаалар кармалды" (сүрөт)

29-мартта УКМК тарабынан Кылмыш-жаза кодексинин 39-358-беренесинин 1-бөлүмүндөгү кылмыштын белгилери боюнча Кылмыштардын жана жоруктардын бирдиктүү реестрине катталган сотко чейинки өндүрүш ишинин жүрүшүндө, Баткен райондук сотунун санкциясына ылайык, Баткен облусунун Лейлек районунун Жаштык айылынын жанында жайгашкан кампага жана ага жакын жердеги "BS-Petrol" май куюучу жайына тинтүү жүргүзүлгөн.

Тинтүү иштеринин натыйжасында, күйүүчү-майлоочу материалдарды ташуу үчүн салондоруна атайылап жасоо жолу менен контейнерлер орнотулган Ssang Yong Musso жана Opel Zafira автоунаасы алынды. Бул тууралуу УКМКнын маалымат кызматынан кабарлашты.

"Кармалган унаалар УКМКнын чек ара кызматынын "Кайрагач" текшерүү пунктуна жеткирип берилди.
Азыркы учурда фактылык жагдайларды жана контрабандага тиешеси бар адамдарды аныктоо боюнча ыкчам тергөө иш-чаралары жүргүзүлүүдө", - дешти мекемеден.