Муфтий шайлоо боюнча курултайдын мөөнөтү жылды

Кыргызстан Мусулмандар дин башкармалыгынын башчысын шайлоо боюнча Аалымдар кеңешинин курултайынын мөөнөтү 29-майга белгиленди.

Бул тууралуу SUPER.KG порталына Аалымдар кеңешинин маалымат кызматынан ырасташты.

Маалыматка ылайык, мындай чечим муфтийликке талапкерлерди караган Каттоо жана аттестациялоо комиссиясынын төрагасы Мамасабыр Досбол уулунун сунушун эске алуу менен кабыл алынган.

Бирок азырынча курултайдын датасын жылдырууга негиз болгон себеп ачык айтыла элек.

Эске салсак, Мамасабыр Досбол уулу 5-апрелге белгиленген курултайды жылдырууну кечээ, 29-мартта сунуштап, Аалымдар кеңешинин төрагасына кат жолдогон.

Буга чейин муфтияттын бухгалтери өзгөчө ири өлчөмдө пара берип жаткан жеринен кармалганы маалымдалган. Ага улай эле муфтий Максатбек Токтомушев кызматтан кетүү тууралуу арыз жазганы белгилүү болуп, кийинчерээк УКМК Максатбек Токтомушев кармалганын маалымдаган.

Ошондой эле 11-февралда экс-муфтий Максатбек Токтомушевдин бошотулушун талап кылгандар Улуттук коопсуздук боюнча мамлекеттик комитетинин алдына митингге чыгышкан.
Бишкектин Биринчи Май райондук соту Кыргызстан мусулмандарынын мурунку муфтийи Максатбек ажы Токтомушевди үй камагына чыгарганы маалымдалган.