"ЭЛДИК КАБАРга" жооп: "Катуу ооруп келген бейтаптарды жандандыруу бөлүмүндө карап же башка ооруканаларга жиберип жатабыз" дешти тийиштүү мекемеден

SUPER.KG порталынын "Элдик кабар" бөлүмүнө ооруп жаткан карындашын эч бир оорукана кабыл албай жаткандыгын айтып окурман кайрылган.

Бул боюнча Ош облустар аралык бириккен клиникалык ооруканасынын директорунун дарылоо иштери боюнча орун басары Канатбек Ашировго байланышканыбызда, төмөнкүлөрдү билдирди.

"Бизде боор ооруларын карай турган гепатология бөлүмү жана жугуштуу оорулар корпусу бар. Ошол эки корпус тең эл аралык грант менен каржыланып, февраль айынан баштап оңдоп-түзөө иштерине жабылган. Азыр ал жерде бейтаптарды кабыл албай жатабыз.

Эгерде боору ооругандар келсе, биздин адистер көрүп, дайындоо кылат. Дарыларын ал өзү жашаган жеринде алып турат. Оңдоп-түзөө иштери апрель айынын аягы май айынын башында бүтүрүү пландаштырылган. Азыр терезелери алмашылып, канализация, эшиктери каралып, баштан-аяк капиталдык оңдоп-түзөө жүрүп жатат. Катуу ооруп келген бейтаптарды жандандыруу бөлүмүндө карап же башка ооруканаларга жиберип жатабыз", - деди Канатбек Аширов.