Өлкөдө мамлекеттик билим берүү стандартын жаңылоо пландалууда

Билим берүү жана илим министрлиги Мектептик жалпы билим берүүнүн мамлекеттик билим берүү стандартын (мындан ары - МБС) кайра карап чыгуу боюнча ишти улантууда. Бул тууралуу аталган мекемеден билдиришти.

Билдирүүдө жазылгандай, жумушчу топтун курамына кыргыз билим берүү академиясынын кызматкерлери, директорлордун окуу-тарбиялоо иши боюнча орун басарлары, предметтик мугалимдер кирген кеңейтилген жумушчу топ түзүлдү.

МБСны кайра карап чыгуу үчүн төмөнкү факторлор негиз болду:

• билим берүү системине карата заманбап талаптар;
• билим берүү системине өнүктүрүү программасында көрсөтүлгөн мамлекеттик жана социалдык буйрутма;
• эмгек рыногунун талаптары;
• өлкө аймагында ратификацияланган эл аралык документтерге дал келүү.

МСБ төмөнкүлөрдү:

• мектептик билим берүүнүн приоритеттүү багыттарын;
• мектептик билим берүүнүн максаттарын жана милдеттерин;
• негизги жана предметтик компетенттүүлүктөрдүн тизмегин жана алардын жетишкендиктеринин деңгээлин;
• билим берүүнүн жыйынтыктарын баалоонун негизги принциптерин (билим берүү системи, мектеп, класс жана окуучу) аныктайт.

МБСны кайра карап чыгууда төмөнкүлөр эске алынат:

• жалпы теориялык көрсөтүүнүн деңгээли;
• окуу предметинин деңгээли;
• окуу материалынын деңгээли.

МБСнын алкагында предметтик стандарттар, тиешелүүлүгүнө жараша базистик окуу планы жана окуу программалары кайра каралып, жаңыланат.

МБСны кайра карап чыгуу билим берүүнүн мазмунун жаңылоого, атап айтканда:

• инсанды руханий-адеп-ахлактык жактан өнүктүрүүгө;
• дене бой жактан тарбиялоого;
• кесиптик жөндөмдөргө жана ийкемдүү көндүмдөргө;
• STEAM багыттарын: табигый илимдер, технология, инженердик искусство, чыгармачылык, математиканы тереңдетип окутууга;
• көп тилдүү билим берүүгө;
• инклюзивдик билим берүүгө багытталат.

Даяр материалдар мугалимдик коомчулуктун кеңири талкуусуна чыгарылат.