Кумтөр алтын кенинин ишмердүүлүгүн текшерүү боюнча мамлекеттик комиссиянын мүчөлөрү лабораториялардын иши менен таанышты

Мамлекеттик комиссиянын төрагасы Акылбек Жапаров баштаган эл депутаттары адегенде "Кыргызалтындын" алдындагы борбордук лабораториянын иши менен таанышты. Бул тууралуу парламенттин басма сөз кызматынан билдиришти.

Маалыматка ылайык, аталган лаборатория 1940-жылдары түзүлүп, ошондон бери иштеп келе жаткан. "Бир кезде күнү-түнү тыным албай эмгек кайнап турган лабораториянын азыркы абалы купулга толорлук эмес. Болгону 36 киши иштейт. Эскилиги жеткен лабораториянын рынок шартындагы атаандаштыкка туруштук бериши кыйын. Бул лаборатория деле жеке лабораториялар чыгара турган анализдерди чыгара алат. Бирок аталган лабораториянын азыркы абалы менен аккредитациядан өтүшү кыйын. Мурдагыдай геологиялык чалгындоо иштери кескин кыскарып кеткен. Ошого байланыштуу да лабораториянын иши солгун.

Бирин-экин жаңы жабдуулар алынганы менен толук заманбап жабдуулар менен камсыз кылуу мүмкүнчүлүгү жок. Иштегендердин айлык акылары төмөн. Имарат капиталдык ремонтко муктаж", - деп жазылат маалыматта.

Лабораториянын иши менен таанышуу учурунда жеке тараптар менчик лабораториялар менен келишип алып, мамлекеттин эмес, жеке тараптын кызыкчылыгына ылайык жыйынтыктарды берип коюшу да ыктымал деген пикирлер да айтылды.

Депутаттардын пикиринде мамлекеттик лабораторияны толук кандуу ишке киргизүүгө мамлекет кызыкдар болууга тийиш.