Баткендин Өзбекстан менен чектешкен "Кайтпас", "Өтүкчү" өткөрүү жайларынын иши жанданды (сүрөт)

Баткен облусунун Өзбекстан менен чек арада жайгашкан “Кайтпас”, "Өтүкчү" өткөрүү жайларынын иши жанданды. Бул саамалык салтанаттуу түрдө белгиленип, ага Кыргыз өкмөтүнүн Баткен облусундагы ыйгарым укуктуу өкүлү Өмүрбек Суваналиев жана Өзбекстандын Фергана облусунун башчысы Хайрулло Бозаров баштаган эки тараптын жергиликтүү бийлик өкүлдөрү, жергиликтүү тургундар катышкан. Бул тууралуу өкмөттүн Баткен облусундагы ыйгарым укуктуу өкүлүнүн басма сөз кызматы кабарлады.

Анда Баткен облусунун башчысы Өмүрбек Суваналиев жана Фергана облусунун башчысы Хайрулло Бозаров Кыргыз-Өзбек элин кубанычтуу саамалык менен куттуктап, эки элдин коңшулаштык жакын мамилесин, эки облустун ар тараптуу кызматташуусун жакшыртууда, аталган чек ара көзөмөлдөп өткөрүү жайларынын кайрадан ачылышы, жанданышынын мааниси зор экенине токтолуп, алдыда өнүгүүгө карай жолдо ишенимдүү өнөктөш катары кызматташуу жанданарын белгилешкен.

Бүгүндөн тарта эки өлкө жарандары “Кайтпас” жана "Өтүкчү" чек ара көзөмөлдөп өткөрүү жайларынан тоскоолдуксуз, эки өлкөнүн аймагына өтө алышат. Тагыраагы жүргүнчү ташуучу унаалардын каттоосуна жол ачылды.

Буга чейин пандемияга байланыштуу Өзбекстан Республикасы менен чек арада бир гана “Кадамжай” чек ара көзөмөлдөп өткөрүү жайы иштеп жаткан. Ал учурда Өзбекстан Республикасынын жарандары Сох районуна баруу үчүн 80 чакырым жолду басып өтсө, “Кайтпас” чек ара көзөмөлдөп өткөрүү жайы аркылуу өтүү менен жол алыстыгы 50 чакырымга кыскарат.

Ошону менен катар “Кадамжай” чек ара көзөмөлдөп өткөрүү жайында кыймыл жеңилдейт.

Белгилей кетсек, үстүбүздөгү жылдын 11-12-мартында Кыргызстан менен Өзбекстан Республикасынын өлкө башчылары Ташкент шаарында жолугуп, аталган чек ара көзөмөлдөп өткөрүү жайларын ачууну макулдашкан.

Ал эми Баткен-Фергана облусунун башчылары кызматташуу жаатында бирдиктүү жол картасына кол коюшкан.