Шашылыш билдирүү! Өлкөнүн тоолуу аймактарында нөшөрлүү жаан-чачынга байланыштуу суунун деңгээли көтөрүлүшү күтүлөт

6-апрелде күтүлүп жаткан нөшөрлүү жаан-чачынга байланыштуу республиканын тоо этектериндеги аймактарынын төмөн жерлерин суу капташы мүмкүн, дарыяларда суунун деңгээли көтөрүлүшү күтүлөт. Бул тууралуу Өзгөчө кырдаалдар министрлигинен билдиришти.

Билдирүүгө ылайык, Ош, Жалал-Абад жана Баткен облустарынын тоолуу жана тоо этектериндеги райондорунда сел жүрүшү мүмкүн.

6-апрелден 9-апрелге чейин жаап өткөн жаан-чачынга жана абанын температурасынын жогорулашына байланыштуу өлкөнүн тоолуу райондорунда, Бишкек-Ош унаа жолунун 121-138-чакырымы (Төө-Ашуу ашуусу), 198-255-(Ала-Бел ашуусу, Чычкан капчыгайы), Суусамыр-Талас-Тараз унаа жолунун 1-14-чакырымы (Өтмөк ашуусу), Ала-Бука-Жаңы-Базар-Киров унаа жолунун 71-75-чакырымы (Чапчыма ашуусу), 200-215-чакырымы (Каракысмак капчыгайы, Кара-Буура ашуусу), Мырза-Аке-Кара-Кулжа-Алайкуу унаа жолунун 74-110-чакырымдарында, Бишкек-Нарын-Торугарт унаа жолунун 286-306-чакырымы (Долон ашуусу, Кара-Үңкүр капчыгайы), Казарман-Актал-Чат унаа жолунун 67-93-чакырымы (Кара-Гөө ашуусу), Ош-Сары-Таш унаа жолунун 161-179-чакырымы (Талдык ашуусу), Сары-Таш-Дароот-Коргон – Кара-Мык унаа жолунун 97-98, 110, 136-150 чакырымдарында жана Каракол-Эңилчек унаа жолунун 76-90-чакырымдарында (Чоң-Ашуу ашуусу) кар көчкү түшүүcү жана кар күрткүсү күтүлөт.

Жолдор тайгак болуп, муз тоңот. Унаалардын ортосундагы 500 метр аралык кыймыл чектелиши зарыл.