Түркиядагы Кыргыз жарандары референдумга катышуу үчүн уруксат алды

Референдумга катышуу үчүн Түркиядагы Кыргыз жарандары уруксат алды. Бул тууралуу Кыргыз өлкөсүнүн Түркиядагы элчилигинен билдиришти.

Маалыматка ылайык, Кыргыз жарандарынын шайлоо укуктарын ишке ашыруу максатында Түркиянын тиешелүү мекемелеринен 11-апрелде өтө турган референдумга катышуусу үчүн сыртка чыгууга уруксат алынды.

"Бул уруксат Кыргыз өлкөсүнүн Түркиядагы элчилигиндеги Анкара шаарынын №9036 УШКнын шайлоочулар тизмесинде катталган жарандар үчүн жарактуу. Референдум 11-апрелде саат 08:00дөн 20:00гө чейин Кыргыз өлкөсүнүн Түркиядагы Элчилигинде өткөрүлөт. Шайлоого катышуу үчүн ички паспорт (ID-карта) же жалпы жарандык паспорту (загранпаспорт) болушу керек", - деп жазылат билдирүүдө.

Белгилей кетсек, коронавирус пандемиясындагы чектөөлөрдөн улам Түркияда дем алыш күндөрү коменданттык саат киргизилген. Ошондой эле кечки саат 21:00дөн таңкы саат 05:00гө чейин өлкө боюнча көчөгө чыгууга тыюу салынган.